伊巴: 我離開的話 無人會記得美職

37

今早美職上演西岸準決賽,由兩支來自洛杉磯嘅球隊展開對決,結果由卡路士韋拿坐陣嘅FC洛杉磯以5:3擊敗擁有伊巴嘅洛杉磯銀河,或成伊巴美職嘅告別戰。

是次對決當中,兩位焦點球星都有取得入球。伊巴雖然於比賽中攻入一球,但亦難阻有卡路士韋拿梅開二度嘅FC洛杉磯,最後黯然出局。

早前有報導指已經38歲嘅伊巴將與約滿後離開美職,並會於冬季轉會窗重返歐洲球壇發展,當中意甲嘅國際米蘭、拿玻里都被指有意簽入呢位瑞典神鋒。

對於重返意甲傳言,今場極有可能為最後一場美職比賽嘅伊巴賽後受訪雖沒正面回應,但答案仍然「伊巴味」十足:「我與洛杉磯銀河仍然有兩個月合約期,我嘅未來會係點大家可以拭目以待。如果我留喺美職嘅話當然對聯賽更好,因為全世界都會收看賽事。但假若我離開美職,無人會記得美職。」

伊巴嘅下一站雖然還未明朗,但相信離開美職嘅機會頗大,各位球迷好有機會明年就可見到「呂布」再戰歐洲球壇。