熱刺一蹶不振 摩佬成下任主帥熱門

99

據英國媒體報導,近期狀態低迷嘅熱刺有機會會於短期內進行換帥。普捷天奴下台嘅話,前曼聯主帥摩連奴或有機會入主。

熱刺近兩仗繼被拜仁於歐聯大炒7-2後,回到英超對陣白禮頓再以0-3落敗,令一眾熱迷失望至極。熱刺近六仗比賽只奪得一勝,目前於英超只得11分排名第九,歐聯兩仗得一分亦岌岌可危,與往年原班人馬奪歐聯亞軍之落差極大。

雖然去年於無增兵下殺入英超前四及歐聯決賽,但球隊主帥普捷天奴一直不滿管理層拒絕下放權力購入具質素球員,早前更向記者明言球會一事直接去詢問利維,因自己無力參與。於球隊戰績不佳,加上班主與教練不和之下,普捷天奴於外國賭博網被炒嘅賠率已經成為最熱。

接任人選方面,摩連奴自12月被曼聯解僱以來一直未有尋找到下一份工作,目前大多只會於重要賽事擔任賽評。唔少報導都指夏季轉會窗時有不少球隊都曾希望邀請摩佬執教,但因球會規模太細而被摩佬嫌棄。摩佬早前接受傳媒採訪時就曾經表明:「我正等待合適嘅機會,需要保持耐性。我執教嘅球隊規模及水平必須與我本人作為教練之經驗匹配,我會一直耐心等待合適嘅球會出現。」

另外亦早前有傳摩佬希望等待施丹被炒後再次執掌「銀河艦隊」,不過近期皇馬戰績轉好下明顯非短期內可以成事。

國際賽期後,熱刺將會回到英超於主場迎接榜尾屈福特,隨後就會於歐聯對上小組最弱嘅貝爾格萊德紅星。若普帥於有國際賽期調整下對陣兩支弱旅再有差池,相信離摩佬回歸英超之期不遠。