沙利 :「回歸意大利嘅呼喚非常強烈。」

21

早前多間媒體都報導沙利今夏將會接掌祖雲達斯教鞭,接替離任嘅艾歷尼。原以為助車仔捧走歐霸後會增加其留隊機會,但近日沙Sir受訪時所說似乎已暗示即將重返意甲老家。

沙利近日於意大利接受媒體 Vanity Fair 之採訪,期間被問到與祖雲達斯嘅傳聞時表示「對於像我呢類意大利人,回歸老家嘅呼喚非常強烈。於車路士經歷一個沉重嘅球季,我感到失去咗某些東西。我開始掛念我於意大利嘅朋友,以及我年邁嘅家人。」基本上已表明今季會回歸意大利執教。

此外,主持亦問及到若加盟祖記,是否擔心會被舊東家拿玻里球迷當成叛徒。沙利亦補充:「去年離隊時我選擇到國外執教而非同聯賽球隊,拿玻里人知道我對佢地嘅愛。於教練呢個專業領域上會引領你走唔同嘅路向,但關係唔會改變,所謂忠誠係你執教時付出110%。」

由被問到重返意甲到加盟祖雲達斯沙利都沒明確否認,反而是直接當成已執教祖雲達斯般應對,單看是次訪問其實可見是次轉會基本已成定局。據外媒報導其實沙利身處意大利就係為與祖雲達斯商討接掌事宜,而班馬兵團已準備好為佢支付500萬歐元嘅毀約金,目前只待一切細節落實就會正式公佈。

至於車任新任教頭人選,ESPN 就指現時執教屈福特嘅查維加西亞將成大熱。雖然車路士高層曾對離任祖記嘅艾歷尼有興趣,但經歷干地及沙利兩位意大利教頭後球員明顯未能適應,球會已決定不再選用第三位意大利教頭。此外,林伯特、英格蘭助教荷蘭特、狼隊教頭紐奴都為接班候選人之一。