施丹欲簽普巴 皇馬高層心儀艾歷臣

85

皇家馬德里今夏重建工程一浪接一浪。除咗早早簽入洛迪高及艾達米列達外,昨日亦正式宣佈簽入鋒線新星盧卡祖域,而夏薩特及費蘭文迪嘅收購亦已接近完成。

於中場方面,銀河艦隊亦有意出手令陣容更具競爭力,但教練施丹與高層於人選間就存有分歧。

就施丹而言,增加中場實力嘅首選為曼聯嘅同胞普巴。呢位法國世界盃冠軍成員雖於球會表現起伏不定,但不論身體質素、創造力等都於球壇首屈一指,若經施丹調教或會更進一步。現時普巴與曼聯合約尚餘兩年,屬球會高薪一族。不過由於曼聯今季未能打入前四,下季普巴嘅薪金將受影響。據說球員本身已沒耐性再與紅魔共患難,早前施丹重掌重馬時就曾公開表示為皇馬效力為所有球員之夢想,令曼聯高層感不滿,亦令施丹燃起收購普巴之心。除皇馬外,另一支豪門祖雲達斯亦被指有意搵普巴回巢,要收購呢位中場球星相信定必花費不菲。

至於皇馬高層方面則傾向收購熱刺中場艾歷臣。雖然皇馬近幾年於轉會市場較為平淡並沒太多鉅大收購,但如今球壇通漲過於誇張,球會今夏先後簽入多位球星如夏薩特等都已支出極大,高層認為市價較低嘅艾歷臣較為符合球會利益。論個人實力,艾歷臣近季於熱刺地位舉足輕重,於中場掌控球會命脈,與當年摩迪亦頗有相似。隨住摩迪年紀愈大,皇馬眼看能將摩迪打造成世一自然希望再從熱刺收購核心再做一次。現時艾歷臣與球會只剩一年合約,據 transftermarkt 估計身價為8500萬歐元,遠比普巴嘅1.5億歐元低。

相信大家仍記得當初施丹重掌皇馬時唔少人都指今次佢將會真正掌握大權,可以有效控制球會嘅轉會事宜。目前球會與施丹終於出現首個收購上嘅摩擦,是次除咗「購普巴」或是「購艾歷臣」外,某程度上可能已變成施丹與佩雷斯之間嘅角力。