艦隊重建 皇馬今夏七大收購目標

1651

於今季之前皇家馬德里可算威盡一時,於15-18年三個球季連奪三屆歐聯冠軍,成就一時無兩。可惜去年夏天兩大功臣施丹及C朗同時離隊,銀河艦隊隨即一落千丈。除咗本土聯賽屈居第三外,近屆叱吒一時嘅歐聯更早早於十六強就被黑馬阿積士淘汰。

皇馬近年一改以往作風,於轉會市場少有大牌收購。今屆除有入球機器C朗離隊外,一眾球員如摩迪、卻奧斯等於世盃年亦盡顯疲態,陣容問題開始浮現。今季皇馬入球王竟為一向為球迷所唾棄嘅賓施馬(30球),球隊於短短36場西甲更失足41球,比馬體會多失15球。 攻不銳守不穩下,即使施丹季末重返救駕都未有太大改變,艦隊重建已是刻不容緩,以下就係目前為止與皇馬有傳聞嘅球員名單:

1.夏薩特 Eden Hazard
年齡: 28
國籍: 比利時
現時球隊: 車路士
預計費用: 1億歐元

夏薩特想加盟皇馬早已經係公開嘅秘密,而施丹重掌皇馬更令呢位比利時球星對皇馬更加仰慕。雖然與車路士合約只剩一年,但夏神今季繼續表現神勇,於英超交出16入球15助攻,勇助車仔闖入前四下季鎖定歐聯資格。據報皇馬目前已經與車仔達成協議,只要車路士於歐霸出局或捧盃就會正式宣佈夏世三降臨班拿貝。

2.普巴 Paul Pogba年齡: 26
國籍:
法國
現時球隊:
曼聯
預計費用:
1.6億歐元

剛於去年剛法國勇奪世界盃冠軍嘅普巴於2016年以1.05億身價由祖雲達斯回歸曼聯。今季因與教練摩連奴不和而引起唔少風波,最後球隊決定棄摩保巴。於蘇斯克查上任初期普巴曾交出符合身價嘅表現,可惜於季尾表現下滑,共於34場英超交出13入球9助攻。其實普巴早於去年夏季已尋求轉會到巴塞,但遭活華特拒絕。今季施丹再度上任後,兩方一度互相表達好感,據悉曼聯管理層曾要求普巴於完季前與皇馬劃清界線遭到拒絕,令管理層有所不滿。唔少報導都指曼聯球迷以至管理層已經對呢位「性格巨星」忍無可忍,有意於今夏將佢出售,但成事與否則要視乎紅魔會否就其1.6億歐元身價讓步。

3.盧卡祖域 Luka Jovic年齡: 21
國籍:
塞爾維亞
現時球隊:
法蘭克福
預計費用:
6000萬歐元

C朗拿度離隊後,巴爾未能擔當大任,加強疲弱嘅鋒線絕對係銀河艦隊嘅當務之急。盧卡祖域雖然只有21歲,但今季表現大熟大勇,除咗於德國攻入17球交出5助攻外,亦於歐霸賽事攻入9球,絕對係球壇嘅尖刀之一。上星期就有傳皇馬與法蘭克福達成協議,以6000萬歐元正式收購呢位塞爾維亞前鋒,但法蘭克福主席隨後給予否認。到底係想完季後轉會期先正式宣佈,抑或真係未商討好細節?大家可以期待一下。

4.伊卡迪 Mauro Icardi年齡: 26
國籍:
阿根廷
現時球隊:
國際米蘭
預計費用:
9000萬歐元

除咗盧卡祖域外,近季狀態火熱嘅伊卡迪亦被傳係皇馬收購目標之一。呢位26歲嘅前鋒自2013年加盟國米起於180場比賽狂轟110球。今季雖然有一段時間與球會有問題而被雪,但仍於意甲交出10個入球4個助攻,表現相當不俗。雖然近期伊卡迪及其妻子都表示想續留米蘭,但相信球員本身與教練史巴列堤嘅問題並非短時間可解決,外間普遍認為呢位阿根廷今夏將會離隊。不過皇馬要簽入此子亦絕非易事,因為其身價高達9000萬歐元,最後成事機會可能要視乎其他收購目標嘅結果。

5.基斯甸艾歷臣 Christian Eriksen年齡: 27
國籍:
丹麥
現時球隊:
熱刺
預計費用:
8500萬歐元

皇馬與一向對英超兵情有獨鐘。除咗世界級球星C朗外,亦分別由熱刺引入摩迪及巴爾兩位球隊重心。雖然巴爾於皇馬發展並非十分順利,但多次於決賽發威亦未算絕對失敗。而33歲嘅摩迪自2012年起加盟球隊後除成絕對核心外,更於去年打破「美朗」壟斷勇奪世界足球先生。不過摩迪年事已高,活力有倒退之勢,近日更有指摩迪將於今季後離隊,皇馬絕對有補充中場核心嘅需要。艾歷臣能傳擅射,今季於英超上陣交出7入球、12助攻,表現非常亮眼。呢位丹麥國腳與熱刺合約明年就會到期但遲遲未與球隊續約,睇嚟若皇馬向佢招手亦好大機會成事。

6.麥巴比 Kylian Mbappe年齡: 20
國籍:
法國
現時球隊:
巴黎聖日耳門
預計費用:
2億歐元

數到現時球壇最耀眼新星非麥巴比莫屬。呢位只有20歲嘅法國前鋒去年助國家隊捧起世界盃,現時更被 transfer markt 評選為全球最高身價球員,估計達2億歐元。麥巴比除咗有極高速度外,射術於20歲嚟講亦算神級,自去年為PSG上陣54場就瘋狂攻入43球。單計今季法甲,麥巴比於27場比賽更交出高達30個入球,7個助攻,為目前唯一有望追趕美斯金靴獎嘅球員。外媒曾大爆去年皇馬曾報價此子被拒,但隨住同胞施丹再次執掌皇馬,加上巴黎多屆歐聯都未有進步,相信麥巴比亦慚有離心。France Football 更指皇馬目前已經向巴黎報價2.4億歐元求購麥巴比,希望PSG可以放人。

7.拉比奧特 Adrien Rabiot年齡: 24
國籍:
法國
現時球隊:
巴黎聖日耳門
預計費用:
免費

同是來自巴黎聖日耳門,但拉比奧特與麥巴比相比,於法國班霸中過得極不如意。自去年12月起,巴黎已經公開表示唔會同呢位法國中場續約,更指由於球員及經理人不停誤導球會,將會雪藏拉比奧特到合約期滿為止。拉比奧特合約今夏就會正式到期,雖然被雪藏達半年之久,但球員本身嘅天賦亦令唔少大球員包括祖雲達斯、皇馬等對佢有興趣。皇馬今夏大灑金錢在所難免,但若最後薪金預算仍有剩餘時,免費簽入呢位極具潛力嘅法國中場亦算係唔錯嘅投資。

除咗以上七位球員外,其實有唔少世界級球員都於施丹上任後被傳將會成銀河艦隊重建目標之一。例如迪列治、高列巴尼、尼馬等等都曾被指皇馬極有興趣,而陣中亦有部分球員如華拉尼、施巴路斯等亦有機會離隊。大家都期待下年銀河艦隊將會帶來新氣象,今個轉會窗對皇馬嚟講絕對係至關重要,大家可拭目以待。