尼馬或與PSG續約 關鍵因素決定成敗

86

ESPN 報導,尼馬願意於 PSG 繼續自己嘅足球事業,但續約與否將取決於球隊於歐聯場上成績。

巴黎方面亦對與尼馬續約持樂觀態度,不過續約事宜會等到四月或五月方會開始,目前所有條款或合約內容都仍然未開始制定。

尼馬於去年夏天時曾主動要求離隊重返巴塞,令到與PSG關係變得非常緊張。不過報導指目前尼馬與球會關係已經修複,而該巴西球星亦開始視巴黎為自己嘅城市,PSG為自己嘅球會。

27歲嘅尼馬目前與PSG仍然有兩年半合約,據悉尼馬嘅父親與球會體育總監李安納度已進行數次非正式會面,商討球員嘅未來。於2017年以2.22億歐元將尼馬帶到巴黎嘅經理人 Pini Zahavi 亦仍然與球會有非常緊密嘅關係,有助處理 PSG 與尼馬之間嘅交易。

尼馬自傷癒復出後發揮出色,於過去八場比賽都取得入球,追平咗球會嘅連續入球記錄。今季尼馬於十五場比賽已經為巴黎聖日耳門交出13個入球、7個助攻,對球會可算非常重要。

報導亦同時提及PSG另一位巨星麥巴比,與尼馬不同嘅係PSG已經向麥巴比開出續約條件,但球員目前仍然未有作出決定。不論巴黎或是球員本身都相信皇馬會於今夏求購呢位法國超新星,而PSG方面則希望麥巴比可以再效力球會多一個球季,特別係於麥巴比最後決定續約嘅情況下。