拉奧拿親證迪列治已與祖記完成個人條款談判

25

持續一段時間嘅迪列治爭奪戰睇嚟好快就會有正式結果,經理人拉奧拿 Mino Raiola 宣佈呢位荷蘭中堅已經與祖雲達斯就個人條款達成共識,目前等待祖記與阿積士達成協議就可正式完成交易。

現時19歲嘅迪列治已為阿積士隊長,並已入選荷蘭大國腳陣容。呢位年輕中堅上季帶領阿積士於歐聯殺入四強,擊敗皇馬、祖記等大放異彩,並於季尾一直獲各大豪門關注。

除祖雲達斯外,早前有指皇馬、巴塞、曼聯及PSG等豪門都曾對呢位目前已極具能力嘅中堅非常有興趣,而巴塞更因其阿積士隊友迪莊落實加盟而曾有機會同時購入迪列治。

至於為何祖雲達斯最後會跑出?唔少外媒都表示主因係C朗於歐國聯決賽後親自開口邀請令迪列治難以拒絕 – 迪列治嘅第一年波衫就係C朗當年於曼聯嘅7號球衣,與偶像可同隊比賽令祖記於呢場爭奪戰中正式勝出。

是次轉會交易目前問題只存在於雙方之價錢談判,祖雲達斯早前提出5500萬歐元+1000萬浮動條款嘅報價,而阿積士則希望迪列治可為球隊帶來8500萬歐元以上,雙方差距約為2000萬歐。