奧斯爾表現出色被提早換出 艾馬利解釋惹質疑

103

昨夜英格蘭聯賽盃上演激戰,利物浦與阿仙奴大踢攻勢足球,結果紅軍於完場次憑奧歷治射入關鍵一球與兵工廠打成5:5,並於12碼大戰中擊敗阿仙奴。

今季被艾馬利投閒置散嘅奧斯爾今場終於獲得上陣機會,並表現出色。除於全場交出36個傳球有94%成功率外,更於54分鍾助攻美倫賴奧斯為球隊當時拉開4:2嘅比數。

不過艾馬利似乎仍然對奧燒心存芥蒂,於利物浦追和4:4後就極速將呢位德國球星換走,令球隊中前場再次出現「零創造力」情況,間接導致球隊需進入互射12碼出局。

今場有份擔任賽評嘅紅軍名宿加歷查對艾馬利決定亦有所質疑,表示:「我並不是奧斯爾嘅支持者。不過奧斯爾於球場上明顯比其他球員高上一個層次,你無可能同我講佢唔係阿仙奴嘅一員。有奧斯爾在陣嘅阿仙奴前場,有極大發揮空間。」

艾馬利賽後亦作出解釋:「我與奧斯爾早有溝通,將佢換出場係預先嘅安排。」

不過艾馬利此番解釋並未能令一眾廠迷信服,有廠迷於 Twitter 指早有安排並不代表球隊需要奧燒時仍然莫視實際情況將該球星換走,更有阿仙奴球迷笑稱:可能艾馬利怕奧斯爾踢得太好,沒人可當代罪羔羊。