曼市雙雄爭簽哈利麥佳亞 身價或高達8000萬磅?

169

隨住英格蘭於歐國聯嘅比賽完結,Sky Sports News 透露兩支曼徹斯特球隊都開始對李斯特城中堅哈利麥佳亞嘅收購工作。

曼聯近年防守不穩,每個轉會窗都一直努力尋找可靠嘅後防大將,今次已非首次傳出有意簽入哈利麥佳亞。而曼城方面由於甘賓尼將轉投安德列治,故中堅位置亦有進行補充嘅需要,身為英人而又有一定實力嘅麥佳亞亦算係兩隊首選。近季轉會市場通漲誇張,是次轉會或將刷新當年基爾獲加轉投曼城之5000萬磅英人後防轉會費記錄。

據報李斯特城方面暫時無意出售哈利麥佳亞,故並未有為該中堅作出定價。不過外媒估計哈利麥佳亞嘅英人身份令佢嘅身價高達8000萬磅,比紅軍收購雲迪克嘅7500萬磅中堅世界記錄更高。

Sky Sports News 指曼聯及曼城都唔願意為該名26歲嘅英格蘭中堅付出8000萬磅,但最後成交價定必比獲加嘅5000萬磅為高。雖然蘇斯克查銳意收購哈利麥佳亞呢位極有才華嘅英人中堅以重建球隊,但由於曼城下季可參與歐聯及有甘賓尼接班人作招徠,暫時贏面較大。

若曼城最後成功收購哈利麥佳亞,外媒指紅魔方面會重新將轉會目標移回拿玻里中堅高列巴尼身上,但其身價隨時會更高。