蘇斯克查: 希望圍繞普巴建立球隊

184

蘇斯克查早前接受傳媒訪問,再次大談普巴去向,並指將會圍繞該法國中場建立球隊。

自季中起,普巴就開始傳來離隊消息,轉會對象主要包括球員曾極力讚賞嘅皇馬及舊東家祖雲達斯。不過由於普巴身價高昂,目前一直傳聞都係指兩家球會希望用球員交換方式羅致,但都未進入談判最後階段。

雖然普巴自己亦公開宣稱希望接受新挑戰,但蘇斯克查仍然有信心可留住該中場核心,並對其大加讚賞:「普巴係一個非常出眾嘅球員,而且一直非常專業。我同佢有非常好嘅關係。」

「正如我以前所講,如果普巴於你嘅陣中,無容置疑地你會圍繞佢去建立球隊。對我而言,呢種諗法一直到現在都無改變。」蘇斯克查補充。

雖然蘇斯克查力讚普巴,不過就目前球迷反應而言,不論曼聯、祖記或是皇馬球迷都不太希望下季普巴於球隊當中,大家可以繼續觀望呢場「普巴鬧劇」何時會正式壽終正寢。