利物浦一數據成英超冠軍 曼聯尾二

116

18/19球季英超正式完結,利物浦未能突破歷史贏來首座英超冠軍。不過球隊今季表現突出,除咗艾利臣收獲金手套獎外,沙拿、文尼兩位前鋒又與奧巴美揚共享射手獎,雲迪克亦贏得今季最佳球員,仍然可算係紅軍豐收之年。除咗個人獎項外,利物浦有一個數據亦成英超冠軍。

據著名網站 transfer markt統計嘅英超公平競賽榜,利物浦以41分榮登英超第一名。今季紅軍38場比賽共獲35張黃牌及2張紅牌為各隊中最少,獲得好成績之餘又未有太粗暴嘅舉動。曼城今次則屈居第二,累獲44張黃牌,1張直接紅牌得49分,與另一支打入歐聯球隊車路士一樣。

被稱為「MMA」足球嘅熱刺排名於榜中則只處中遊,以55張黃牌、2張直紅、1張兩黃變一紅得68分排名第8。至於曾經話過哥帥用犯規戰術嘅蘇斯克查,所帶領球隊曼聯於榜中居於尾二。紅魔今季獲71張黃牌、2張直紅、2張兩黃變一紅累積達87分,僅比獲94分嘅「最茅球隊」屈福特稍好。