14隊掌握生死 利物浦可否首奪英超?

885

據英國傳媒 Evening Standard 報導,英超各球會將於本周四舉行會議,若有十四隊同意有可能宣佈今個賽季無效,令利記痛失首個聯賽冠軍。

於阿迪達及赫臣奧度爾確診武漢肺炎下,英超賽會早前已宣佈會暫停賽事至4月4日。由於目前歐洲疫情愈嚟愈嚴重,外界普遍相信呢個停賽期將會不停延長。

英超賽會早前已與召集各球會代表,將於本周四舉行會議去商討餘下賽季安排。至於現時二十九輪比賽後以25分領先嘅利物浦命運據悉於會議上會受到其他球會所掌控。

外媒指是次會議嘅決定需要有2/3嘅英超球會(即14隊)同意才會通過,當中包括以下數個選項:

1) 以目前積分榜完結球季

– 利物浦捧盃
– 利物浦、曼城(若上訢失敗由曼聯頂上)、李斯特城、車路士參與歐聯
– 般尼茅夫、阿士東維拉、諾域治降班

2) 安排季後賽定出歐聯參賽/降班球隊

– 利物浦捧盃
– 有機會參與歐戰、降班之球隊需進行季後賽

3) 直接腰斬 今季作廢

除以上三個選項後,近日外國亦傳出不同英超餘下賽季處理嘅版本,例如今季無人降班,下季增至22隊、今年參與歐戰球隊下年繼續等等。由於每個處理方式都有得益者,亦有損失嘅球會,要達成共識可算是非常困難嘅任務。

若要有更明顯嘅方向,相信需等待星期四會議後才有消息。唯一肯定的一點,就是利物浦能否首奪冠軍目前已非自己可以掌握。