西媒: 皇馬具簡迪優先購買權

696

據西班牙媒體 Defensa Central 透露,皇家馬德里與車路士有一內部協議,對中場大將簡迪具有一個類似優先購買權嘅優勢。

「銀河艦隊」今夏於轉會窗大手購入多位球星,包括夏薩特、祖域、文迪等,但其重建工程並未完成。早前曾與皇馬傳出新聞嘅大牌球星尼馬、普巴等最後都未能成事。

今日西班牙媒體就再透露皇馬今夏轉會窗時嘅另一位目標,竟然係車路士嘅簡迪。據悉當時皇馬於購入夏薩特後,亦有再向車仔詢問簡迪嘅售價。不過由於當時車路士已將「世三」售予皇馬,球會亦深受轉會禁令影響,故最後亦成功力勸簡迪於倫敦再留一季。

報導亦指簡迪其實自己亦有意跟隨夏薩特,轉投皇馬效力,不過最後因應車仔狀況同意暫時留隊。

不過皇馬於收購簡迪上並未正式結束。因應兩支球隊嘅關係良好,車路士已向皇馬保證當球隊願意出售簡迪,又或有球會對該法國中場出價時,車仔會通知皇馬,令其簡接地擁有一個優先購買嘅優勢。

現時簡迪與車路士尚餘4年嘅合約,周薪高達29萬鎊嘅簡迪並非全無機會離隊。簡迪嘅超卓防守能力為目前皇馬中場最缺乏的,再加上其法國人嘅身份,相信施丹於未來嘅轉會窗都會盡力收購呢位「新馬基利尼」。