辛祖不滿FIFA 20評分制度

190

《FIFA 20》於今個月27日就會正式推出,昨夜 EA 更正式公佈今屆各球員數值。EA 嘅評分制度多年來都受到唔少質疑,而今屆率先就有多蒙特新星佐頓辛祖於 Twitter 上作出批評。

現年只有19歲嘅辛祖今年獲 EA 大幅上調數值,整體評分由 72 分躍昇到 84 分,不過辛祖對其傳球數值就有所不滿。

該多蒙特球星於 EA 公開數值後於個人嘅 Twitter 上傳其 FIFA 20 球員數值,並配以一句”77 passing?!” 及表示質疑嘅 Emoji,明顯對其傳球評分被低估表示不滿。

不過 EA 亦於極短時間內作出回覆,並向辛祖表示「當你有90盤球時,點解仲要傳球?🤷‍♂️😂」

辛祖亦隨即作出回應,認為自己傳球與盤球都應該為90數值。

當大家以為事情就此完結時,辛祖又再現頑皮本色。呢位年輕小將於多蒙特官方 Twitter 分享隊友韋素球員卡時就將其 Retweet 並再配上一句「Better passing 🧐🧐😅」,令人哭笑不得。

不過客觀而言,辛祖上季表現亦確實值得一個更高數值。該名英格蘭翼鋒於18/19德甲共交出12個入球,同時亦有17個助攻,而今季開始不久亦已為球隊貢獻三個助攻。相信若辛祖可以維持高效,EA將其評分上昇亦指日可待。