Hopper HQ 公佈球星IG身價榜 C朗IG出一個Post要…..?

237

社交媒體專家 Hopper HQ 近期發佈咗全球知名運動員嘅「Instagram 身價榜」,以各運動員於 Instagram 發一個貼文嘅價錢作為準則,結果球王C朗拿度一如所料榮登榜首。

C朗拿度嘅 Instagram Followers 高達1.77億。據資料顯示,商業品牌要係呢位世界巨星嘅 Instagram 貼文每次需支付高達97.5萬美元,換算成港幣就需約762萬左右,認真誇張。

排行第二位為另一位足球界巨星尼馬,資訊顯示需要於該巴西球星 Instagram 上發佈一則貼文需要72.2萬美元,換算成港幣約為564萬左右。

於榜中排行第三、四位嘅亦係足球員身份,分別為球王美斯及已退役嘅「萬人迷」碧咸。而「大帝」LeBron James 則以27.2萬美元成第五位,為非足球員中嘅榜首,但其價值只有C朗嘅四分一左右。

除此以外,Hopper HQ 亦同時公佈全球知名人士「Instagram 身價榜」。結果 Kylie Jenner 以 126 萬美元一個 Instagram 貼文榮登榜首,C朗於總排名榜中則屈居 Kylie Jenner 及 Ariana Grande 後排名第三。