正式玩完? 巴爾再一次無緣大軍名單

198

除英超煞科外,今晚西甲亦會進行10場賽事。西甲基本上前列位置已經篤定,現時前列各隊看點似乎都為下季試陣或觀察表現為多,當中尤以夏天急需重整陣容嘅皇馬最多陣容變換。

銀河艦隊現有陣容中,相信大家都對大牌球星巴爾去向最有興趣。呢位威爾斯巨星雖然於施丹上任後重獲上陣機會,但一直表演平平,於主場更屢屢受到球迷柴台。

不過巴爾於皇馬嘅未來似乎已經走到盡頭。繼上輪對陣維拉利爾後,身體健康狀況良好嘅巴爾再一次落選大軍名單,未有機會於季尾展示自己身價。照情況睇,施丹看來已經下定決心清除巴爾,現時問題只係有什麼球隊可以接巴爾呢個如此高轉會費及薪金嘅威爾斯球星。